阿史早排介紹英國前首相張伯倫，喺在任期間對德國採取綏靖政策，簽署《慕尼黑協定》迫使捷克斯洛伐克將蘇台德區割讓俾德國。講起捷克斯洛伐克，呢個國家响上世紀90年代初分成捷克同斯洛伐克兩個獨立國家。早喺1989年，隨住柏林圍牆倒下、匈牙利民主化等等，捷克斯洛伐克亦都响當年11月17日開始爆發「天鵝絨革命」，每日都有過萬民眾上街，要求結束捷克斯洛伐克共產黨管治、舉行公開選舉。

同年12月29日，捷克斯洛伐克舉行首次民主選舉，「天鵝絨革命」領導人哈維爾當選總統，捷克斯洛伐克國名亦由「捷克斯洛伐克社會主義共和國」改名為「捷克和斯洛伐克聯邦共和國」。聯邦政府實施經濟改革，推行私有化、開放物價，但由於捷克同斯洛伐克兩邊嘅經濟發展水平不一，為斯洛伐克帶嚟唔少負面影響。

到咗1992年，捷克斯洛伐克舉行第二次大選，捷克嘅公民民主黨同斯洛伐克嘅「爭取民主斯洛伐克運動」，雙方舉行過多次會談都係組閣失敗，最終雙方喺7月23日達成協議，同意將捷克斯洛伐克分成兩個獨立的主權國家，11月25日議會通過《解體法》，決定响1992年12月31日自動解體、捷克同斯洛伐克成為兩個獨立國家。

圖片為斯洛伐克民眾，取自網絡。