以二戰為題材嘅動畫——《再見螢火蟲》

呢排都同史友們講唔少二戰戰時嘅日本，除咗歷史相片可以講到故事之外，歌影視作品都出樣可以帶出果個年代嘅慘況，阿史今次想介紹嘅就係大家童年都應該會睇過嘅一部動畫——《再見螢火蟲》。

《再見螢火蟲》原著係由日本小說家野坂昭如創作，屬於半自傳性質嘅小說，講述佢自己喺二戰果陣日本嘅體驗，當時佢都真係有個契妹餓死咗。呢部作品喺1967年就得到第58屆直木賞，去到1988年，吉卜力工作室高畑勳決定執導呢部動畫，並將原本嘅小說改編。成個動畫嘅標題並無用到螢火蟲個「蛍」字，反而係用咗另一個同音異字嘅「火垂る」，大概就係寓意人嘅靈魂好似一顆漂浮嘅火球咁。

故事以作者喺讀書期間遇到嘅神戶大空襲作為背景，故事係用倒敘法開始，畫面開頭係一個車站入面有一位死去嘅少年，車站職員就發現呢位少年身上有一個生鏽糖果罐，罐口有啲撒出白色粉末，而呢啲正正係妹妹嘅骨灰。故事講述戰時嘅日本有兩兄妹，分別係14歲嘅男主角清太同埋4歲嘅節子，媽媽不幸喺轟炸中死去，兩兄妹就只好流離失所、三餐不繼，最後就相繼餓死，好似螢火蟲咁結束短暫嘅生命。