阿史之前介紹過肇慶係廣東嘅黃金之鄉，最近阿史睇到段關於廣州南沙嘅宣傳片，就話當地有「軟黃金」，到底係乜嘢咁巴閉呢？
呢樣嘢叫做香雲紗。香雲紗係一種獨特絲綢面料，被視為絲綢中嘅極品，主要產地為廣東南海、順德、番禺一帶。香雲紗製作時需要經過「三洗九蒸十八曬」幾十道工序，將白綢用廣東特產植物薯莨汁液浸染，再將浸泡過薯莨汁嘅綢布平鋪响露天草地上，然後用河塘泥漿塗抹响綢布之上，經烈日暴曬令泥質中嘅鐵離子同薯莨汁中嘅鞣酸產生化學作用，生成黑色嘅鞣酸亞鐵，製成光亮潤澤嘅香雲紗。由於製作香雲紗用嘅白綢本身已經好貴重，再加上工序繁瑣，所以香雲紗係相當值錢。以前最貴時曾賣到每匹十二両白銀。
據史料記載，早响明永樂年間，廣東順德就開始生產並出口香雲紗。响上世紀三十年代，香雲紗生產達到鼎盛時期，單係順德就有香雲紗生產工廠五百幾家，過萬名工人，日產香雲紗四千幾米。而响好一段時間，香雲紗製成嘅唐裝為海外華人富豪們追捧，亦成為出口賺外匯嘅貨品。時至今日，一度衰落嘅香雲紗成為咗國家級非物質文化遺產，所以再次成為「軟黃金」。
原圖嚟自網絡