上次介紹咗九十年代深圳出現咗全國第一座「書城」，其實响九十年代，深圳呢個城市高速發展，有好多時代領先全國嘅事物出現咗，就好似以下介紹嘅世界之窗。
如果史友去過深圳坐地鐵，都應該會見過世界之窗呢個站。响好一段時間，深圳世界之窗係內地一個著名旅遊景點，亦係改革開放一個重要標誌。世界之窗於1994年開業，佔地48萬平方米，係內地著名縮微景區為主題嘅主題公園。世界之窗按五大洲劃分，展示包括法國埃菲爾鐵塔、巴黎凱旋門等130個世界著名文化景觀同建築奇蹟。當年世界之窗嘅宣傳口號大概係「用一日時間，行勻五大洲」（類似係咁啦）。其實當年世界之窗响深圳出現，相關發展單位係有一個特別諗法，就係等國人增加對世界嘅認識，通過世界之窗長長見識。因為响八九十年代，內地社會仲未係太富裕，出國旅行並唔係一般國民能經常做嘅事。所以，國人通過深圳世界之窗了解異國風情，感覺就好似去咗好幾個國家，慳返唔少時間成本同旅遊費用。所以世界之窗當年全國聞名，連香港人都會去玩下，係有原因嘅。
原圖嚟自網絡