之前阿史都講過，以前深圳响改革開放初期係以羅湖區為發展中心，所以响羅湖區就有唔少昔日深圳標誌性嘅建築物，國貿大廈就係其中之一。
深圳國貿大廈位於羅湖區人民南路商圈，响改革開放初期極具象徵意義，因為呢幢建築物開創多個先河。國貿大廈樓高160米，共有53層，响上世紀80年代曾經係全國第一高樓。另外，當時國貿興建時採用當時內地第一套大型內外筒整體同步滑模嘅新工藝，令興建速度大大提高，1984年4月封頂時，就較預計工期整整提前一個月。所以，國貿大廈响當時代表咗「深圳速度」。仲有就係，國貿大廈頂層係一間旋轉餐廳，亦係內地第一家旋轉餐廳，响八十年代而言絕對係高大上。
亦因為呢幢建築物响當時風頭咁勁，所以已故領導人鄧小平响1984年到訪廣東巡視時，就參觀尚未建成嘅深圳國貿大廈。而响1992年南巡時，佢仲响深圳國貿大廈嘅旋轉餐廳裏聽取廣東省委同深圳市委主要負責人匯報。
原圖嚟自網絡