最近睇畸寶新聞，話廣州係嶺南地區古琴藝術嘅根據地，從古至今發展落嚟傳承咗呢項中華文化藝術。講到從古至今，咁又有幾古呢？
古琴藝術响中國已經有成三千年歷史，而早於秦代，中原琴藝已經傳入嶺南一帶，到咗漢代逐漸响番禺興起。而响廣州南越文王墓，就出土過七枚古琴軫，證明秦漢時期古琴藝術已經傳入咗嶺南地區。經過歷朝歷代演變，形成咗嶺南琴派。嶺南琴派保存咗唔少有名嘅古琴樂器，其中就有被譽為嶺南四大名琴嘅唐琴「綠綺台」、「春雷」、「秋波」、「天蠁」，仲有「都梁」、「松雪」、「振玉」、「水仙」等名琴，都保留咗中國古琴傳統特色。
至於响過去歷史當中，嶺南地區就出現咗唔少有名琴師，好似南北朝時期的侯安都，五代十國時期陳用拙，明代陳白沙、鄺露、陳子壯、陳子升等。而到咗清代道光年間，以黃景星為代表嘅嶺南琴派開始形成，而且聲名漸顯，成為中國古琴藝術其中一個重要流派。
原圖嚟自網絡