20世紀初果陣，先施百貨嘅成功經營模式，啓發咗後嚟幾間百貨公司嘅創辦人，大新百貨就係其中一間，佢嘅創立，揭開上海四大百貨公司鼎足而立嘅局面。

大新創辦人蔡昌籍貫廣東中山，佢本嚟係先施創辦人馬應彪嘅得力助手。早年，蔡昌嘅哥哥蔡興去澳洲打工，同馬應彪夾份經營永生生果鋪，蔡昌亦有喺永生幫手。蔡昌善於觀察，又肯捱苦，佢發現金礦入面嘅華工無時間入城採購，就用低價收購每日賣剩嘅果蔬運去礦區賣。由此，蔡昌賺咗佢嘅第一桶金，後嚟仲自己另起爐灶，開咗泰生果欄，同永生、永安三分悉尼嘅果蔬市場。

馬應彪好欣賞蔡昌，1900年先施成立之初就委托蔡興，將蔡昌招入麾下，並委以重任。蔡昌足足喺先施服務咗十年，掌握咗百貨公司經營要訣之後，同蔡興一齊創辦大新百貨，取其「旭日初升，大展新猷」之意。不過，大新都仲未正式開張，行內已經掀起一場暗湧，先施、永安、新新聯合通知國貨廠商，以停止採購爲威脅，禁止廠商向大新供貨。大新開業之後，三家公司仲一齊搞春季大減價，勢要逼到大新無碇企。

面對三大百貨公司「圍剿」，大新越挫越勇，四圍搵貨源之餘，仲注重創新，特別向生產商訂購「大新牌」香皂、襯衫、雪茄等商品，打造自家牌子以優惠價推出，採取薄利多銷嘅策略吸引市民。由於反應熱烈，後嚟市民必須憑票入場，認真架勢。大新吸收前人嘅經驗，推出一系列新服務，例如代客試衫、代客送貨、代客設計、代客安裝、送貨上門等等，深受市場歡迎。

大新雖然起步較其他三間百貨公司慢，但就創下咗多個「第一」，除咗面積第一、第一個全天候開放冷暖空調之外，佢亦以樓高9層成為最高嘅百貨公司。大新 6樓及以上嘅樓層集茶館、影院、劇場等娛樂場所於一身，吸引大批客人消費。此外，大新仲係全亞洲第一個採用自動扶手電梯嘅百貨，吸引全上海嘅男女老幼爭住去試搭。

圖為1936年嘅大新百貨，以及上海大新嘅扶手電梯。網上圖片