去年今日，日本邪教組織奧姆真理教教主麻原彰晃（本名：松本智津夫）同6名教中核心成員，因為多宗案件而被執行絞刑處死。奧姆真理教喺1995年發動嘅東京地鐵沙林毒氣案，造成13人死亡、超過6300人受傷。邪惡背後，到底隱藏咗咩不為人知嘅經歷？原來麻原彰晃細個時已經夢想從政，佢創立奧姆真理教之後，1990年創立「真理黨」參加眾議院選舉，但全部教團成員都落選。《日本經濟新聞》曾經報道，麻原彰晃喺選舉失敗後開始憎恨國家、企圖顛覆政權，教中人甚至開始仿製槍械、研究生化武器，包括沙林毒氣同VX毒氣等等。

麻原彰晃1955年生於熊本縣，因為有視力障礙而入讀盲人學校，細細個就同身邊嘅人講希望長大之後從政。畢業之後，喺補習學校認識妻子松本知子，二人1978年結婚、育有4女2子。喺1984年麻原彰晃創立咗瑜珈道場「奧姆神仙會」，其後改稱「奧姆真理教」。麻原彰晃聲稱自己有空中飄浮嘅超能力，又發表一系列世界末日預言，煽動社會。麻原彰晃嘅神秘背景吸引唔少人盲目跟隨，令奧姆真理教迅速擴大。

其後，奧姆真理教開始合理化殺人行為，以實踐所謂嘅「教義」，有想退教嘅教徒慘遭毒手。1989年，一位抨擊奧姆真理教嘅律師更被殘忍滅門。奧姆真理教成立嘅「真理黨」响選舉失利之後，麻原彰晃就開始入魔。1995年3月一個朝早上班繁忙時間，多名教徒就喺東京地鐵列車上放沙林毒氣，導致多人死傷。日本警方2個月後拘捕麻原彰晃，審訊期間佢一直否認涉案，仲話係啲弟子自作主張。不過邪不能勝正，最終佢喺2006年被東京高院判處死刑，延至去年執行。

圖為麻原彰晃發表競選演說、1995年東京地鐵案發現場，取自網絡。