阿史早排行過荔枝角D2 Place二期,見到以荔園為主題嘅「我們的荔園」展覽同嘉年華,就買飛入場睇吓。除咗攤位遊戲,入面居然仲有Yes! Card抽,阿史貪得意玩吓,抽到一張介紹荔園嘅Yes! Card,上面提到台灣前總統馬英九嘅媽媽秦厚修都喺荔園做過售票員,真係估佢唔到。

相信部分史友都知,馬英九1950年响香港廣華醫院出世,1歲多嗰陣就跟住屋企人去台灣定居。馬英九爸爸馬鶴凌係國民黨一位資深黨員,曾經擔任蔣介石嘅侍衛官同秘書。國民黨喺內戰失利、撤退去台灣嘅時候,馬鶴凌安排佢媽媽、三個女以及懷孕中嘅老婆秦厚修喺香港團聚,於是秦厚修就喺呢段時間生咗馬英九。

馬家喺香港期間生活清苦,馬鶴凌同秦厚修都喺荔園打工,秦厚修就做售票員,而馬鶴凌就喺日頭整饅頭,夜晚去荔園做茶房,而馬鶴凌媽媽就喺屋企照顧幾個孫仔孫女,後來一家就過咗台灣生活。

圖為昔日荔園、馬家合照,取自網絡。