最近睇內地綜藝節目見到影星章子怡，令阿史諗起好多年前睇過張藝謀導演執導嘅電影《十面埋伏》，除咗張章子怡，套戲嘅主演仲有劉德華同金城武主演。套戲講述由劉德華飾演劉捕頭、金城武飾演嘅金捕頭，為咗緝捕飛刀門餘孽，就設圈套將飛刀門幫主個女、章子怡飾演嘅小妹捉拿，之後金捕頭就扮成黑衣人劫獄救走小妹，做臥底調查飛刀門。但原來劉捕頭本身都係飛刀門嘅臥底，為咗調查飛刀門被滅絕嘅真相先至會喺官府做臥底，希望贏得心上人小妹嘅芳心。之不過喺金捕頭同小妹短短相處，就已經互生情愫。

想當年，套戲原本係諗住由梅艷芳飾演大姐一角，但當時梅艷芳已經病重，連劉德華都勸佢辭演，好好留喺香港休息，但梅艷芳仍然好想飾演呢個角色，唔肯辭演呢個角色。梅艷芳嘅病情不斷轉差，最終响2003年12月30日病逝，都係無法拍攝呢套戲。最後劇組決定唔換角，改劇本將戲份集中喺劉德華、金城武、章子怡三個角色身上，而大姐呢個角色永遠留俾梅艷芳。因為呢嘅原因，梅艷芳雖然無法演出，但片尾依然有「謹以此電影懷緬梅艷芳小姐」嘅字幕，紀念盡心為影視界、為套戲嘅梅姐。

圖為劇照，取自網絡。