近排阿史翻煲96年版嘅《笑傲江湖》,不得不再次佩服呢套劇嘅選角,無論主角、配角都做得入型入格,其中最經典嘅梗係王偉版嘅「偽君子」岳不群喇!王偉外形嚴肅正氣,扮演正派嘅華山派掌門簡直係順手拈來。但岳不群呢個角色最難掌握嘅就係要演出嗰種表裡不一嘅心態,外表要扮正經、正義令人完全信服,但內心就陰險毒辣。呢方面王偉就拿捏得恰到好處,就連後期岳不群為咗練成葵花寶典而自宮之後嗰種陰柔,王偉一樣carry到,簡直好似由小說裡面行出嚟嘅岳不群咁,根本無得輸。

除咗岳不群之外,王偉仲演活咗《滿清十三皇朝》嘅努爾哈赤、《秦始皇》嘅呂不韋、《火玫瑰》嘅喬永發等經典角色。上世紀90年代,王偉移居加拿大,慢慢淡出演藝圈,之後喺2002年退休,長居多倫多。不過,喺2011年今日,王偉因胃癌逝世,佢扮演嘅岳不群亦成絕響。 

圖為《笑傲江湖》劇照,原圖嚟自網絡。