千祈唔好以為廣東省內冇乜古蹟，趁住假期，阿史推薦鍾意尋訪古蹟嘅史友不妨去潮州行一行，因為當地就有一座超過800年歷史、與趙州橋、洛陽橋及盧溝橋合稱為「中國四大古橋」嘅廣濟橋。

廣濟橋又叫湘子橋，始建於公元1171年，當時只係一座浮橋，後來經過歷代改建，陸續喺江面上建起23個石橋墩，橋面上仲有亭屋126間、橋樓24座，呢個就係著名嘅「廿四樓台廿四洲」。

廣濟橋另一個獨特之處，就係橋嘅兩邊係喺橋墩上鋪設石梁搭建嘅梁橋，而中間部分就係用18條木船連接而成嘅浮橋；而喺橋兩側嘅第一個橋洞，仲採用咗拱橋嘅造橋技術。

中國嘅古橋有梁橋、拱橋、浮橋、索橋四大類型，而呢座廣濟橋就集合咗拱橋、梁橋、浮橋三種形式於一體，中國著名嘅橋梁專家茅以升就曾稱讚廣濟橋係「世界上最早的啟閉式橋梁」。

原圖取自大公報。