詹天佑，阿史細細個已經聽過佢個名。被譽為中國鐵路之父及中國首位鐵路總工程師嘅佢，係鐵路工程專家，參與中國多條鐵路嘅興建，今時今日大家可以沿著鐵路搭火車前往不同城市，詹天佑功不可沒。不過唔講唔知，佢當年原來一度被睇小，認為佢無料，全靠自己堅持同努力，最終吐氣揚眉。嘩~咁勵志嘅故事，阿史即刻講你知。

詹天佑1861年响廣東省南海出世，12歲成為中國第一批留學美國幼童，接觸西方知識同科技，1881年於耶魯大學土木工程系畢業。回國之後，佢被分派到福州船政學堂，直至1888年，佢到李鴻章同伍廷芳興辦嘅中國鐵路公司擔任見習工程師，真正能夠學以致用。

詹天佑先後參加修建津塘鐵路、唐山至山海關鐵路等等。1905年，他擔任京張鐵路總工程師，主持興建京張鐵路。京張鐵路係中國自主設計嘅第一條鐵路，全長約200多公里，經過長城內外嘅燕山山脈，當中八達嶺係最高峰，而「關溝段」地勢非常險峻。當時有外國人嘲諷，「識修鐵路過關溝段嘅中國工程師仲沒出世呢」，仲有人話詹天佑坐上鐵路總工程師個位，係「不自量力」。面對質疑同攻擊，詹天佑用默默耕耘，反駁一切。

京張鐵路最困難嘅係八達嶺隧道工程。為了確保提前建成鐵路，詹天佑採用分段施工。詹天佑好有腦，利用「折返線」嘅原理，响山多坡陡嘅青龍橋修筑一段人字形線路，佢嘅創新做法，成功降低關溝段嘅線路坡度，而八達嶺隧道長度減少一半。詹天佑亦創建「豎井開鑿法」開挖隧道，蜚聲中外。

為咗保証施工質量，詹天佑响工地食住，親自把關，不分晝夜咁勤奮工作，成為其他員工嘅榜樣。响詹天佑團隊嘅努力之下，原定六年施工期，响四年內就提前完成，創造中外築路史上嘅一大成就。