廣州之名係點嚟？

廣州係廣東省省會呢點都唔駛點介紹，咁史友們有無諗過，廣州呢個名係點嚟同埋幾時嚟呢？

响西漢元封年間，全國分為13刺史部，嶺南九郡隸屬於交趾部。到咗東漢時，交趾就由部改為州，即交州，州治（即當時州政府駐地）設於蒼梧郡廣信縣，位置大概係今日廣東西北部。據《後漢書‧郡國志》所載，東吳交州刺史步騭將交州州治由廣信遷至番禺。後嚟孫權就將交州分為交州同廣州，以交趾、合浦為界，北部東部為廣州，西部南部為交州，史稱「交廣分治」。分治後廣州下轄南海、蒼梧、鬱林同合浦四郡，「廣州」得名亦係呢個時候開始。

不過，東吳時期出現嘅「廣州」，就唔係今時今日大家認識嘅廣州市，而係一個行政管轄區嘅名。當時廣州州治設响番禺城。廣州取代番禺之名，就由唐代開始。