上回講到詹天佑威水史，又點止咁少？阿史細個讀書嗰陣，就讀過詹天佑同詹氏鈎嘅關係，依種掛鈎可以令兩個車廂自動對接，非常方便。

詹氏鈎之所以聞名中國，其實係因為詹天佑修建京張鐵路時，採用咗依款掛鈎。其實真正發明詹氏車鉤嘅, 係名叫Janney嘅美國人。據講詹天佑响耶魯大學學習鐵路工程時, 接觸到依種掛鉤（Janney Coupler）。當佢建造京張鐵路時, 外國人聽到個掛鉤嘅中文譯名叫做詹氏鉤時, 就擺咗個大烏龍, 以為個掛鉤係詹天佑發明。詹天佑嘅孫詹同偉曾說，祖父特別响自己嘅工程筆記上寫明：「此掛鉤非我發明」。

詹天佑對中國鐵路發展貢獻良多，1916年獲香港大學頒授榮譽法學博士。詹天佑於1919年4月逝世，其後與妻子合葬北京西郊。1982年，詹氏夫婦嘅骨灰從北京遷葬京張鐵路嘅青龍橋車站，永遠長伴佢一生驕傲嘅懷抱。