今日係冬至，相信史友們都可以早收工返屋企做冬，做冬大過年嘛！
講到做冬，唔知史友們有無聽過廣東人响冬至個日，會食糯米飯呢？廣東人响冬至食糯米飯呢個習俗由來就有唔同講法，其中一個就係話辟邪作用，寓意溫暖，所以冬至食糯米飯就可以保家人平安，亦因為冬至闔家食飯，一齊食保全家平安就啱晒喇！另一個講法就同「肥冬瘦年」有關，基於「冬大過年」「肥冬瘦年」嘅觀念，所以冬至一定要食啲肥膩嘢，用上臘肉、臘腸呢啲配料嘅糯米飯就啱晒喇！