今日响網上見到個消息都有啲傷感，就係由紅磡往來廣州東站嘅直通車可能好快停線，以後要坐火車去廣州就要去西九搭高鐵喇！

穗港直通車對上一代香港人以及廣東省同胞而言，重要性絕對係難以用筆墨形容。1911年廣九鐵路開通，初代直通車就行走穗港兩地。但到咗1949年新中國成立以後，直通車因政治原因停駛。直至1979年年初，國家鐵道部向國務院申報《關於開行廣州——九龍直通旅客列車問題的請示》，並好快獲得國務院批准。同年三月，時任港督麥理浩响訪京時表示希望返香港時能夠乘坐首班直通車，最終兩地確定通車日期為4月4日，麥理浩亦一如所願坐首班直通車返港。

就係咁，直通車就成為唔少香港人返內地鄉下嘅交通工具。但以往受限於技術問題，直通車車程比較耐，要花成三個幾四個鐘先到達終點站。隨住火車鐵路不斷升級，穗港直通車車程用兩個幾鐘就可以完成喇！

對於阿史呢啲坐開直通車嘅人嚟講，無咗紅磡開出嘅直通車，真係有啲可惜。因為，直通車個隻鹵水雞脾真係好好食。

原圖嚟自網絡