上次講咗唔少中國鐵路之父詹天佑嘅威水史，今次同史友分享吓佢嘅另一面。詹天佑生活嘅年代，唔少名人好似梁啟超同康有為等等都有納妾，凸顯出只有一個老婆嘅詹天佑與眾不同、從一而終。佢1887年同父親好友嘅女兒譚菊珍响澳門結婚，兩人共有三個囡囡同五個囝囝。因為詹天佑成日周圍去興建鐵路，所以八個仔女分別响唔同地方出世，包括廣州、北京、山海關等等。

詹天佑本身好錫老婆，佢見到妻子平時食飯速度比較慢，好多時仲未食完飯，啲飯餸已經凍曬，有見及此，佢專門幫老婆整咗套保溫餐具，等老婆可以食到溫熱嘅飯菜，認真細心。因為老婆嘅名入面有個「菊」字，所以詹天佑亦都好中意種菊花。因為譚菊珍有肺病，成日臥病在床同咳血，所以身邊有唔少人同詹天佑講，話幫佢搵返個妾侍，但詹天佑好專一，回絕對方，一條心照顧老婆。

詹天佑認為對老婆唔好嘅男人，都一定唔會對事業同朋友一心一意，所以當佢聽到人地兩公婆嘈交，都會覺得係男方做錯。打完成篇文，阿史真係學到嘢，各位男史友，你哋收到未？

圖為詹天佑修築鐵路時，妻子譚菊珍响旁邊陪伴在則。（網上圖片）