最近睇返許冠文九十年代拍嘅作品《丐世英雄》，講佢帶同幾位前軍隊下屬去廣州闖天下諗住起馬村，點知非常落泊，仲被人話佢係「九無領導人」，其中一無就係「無去過卡拉OK」。對白雖然抵死，不過就反映當時卡拉OK响內地有幾咁時尚。
咁內地第一間卡拉OK，又係幾時同响邊度出現呢？答案就係八十年代嘅廣州市！作為改革開放窗口嘅廣州，响八九十年代就出現好多現代化酒店，以招待嚟中國做生意嘅商人以及世界各地嘅旅客。而响1988年1月，內地第一家卡拉OK廳就响外商經常入住嘅廣州東方賓館開業。不過呢間卡拉OK就唔係今時今日流行一間一間房嘅包間式，而係一個能夠容納60人嘅開放式大廳，有一個小舞台等每枱顧客輪流上去唱歌，十足登台一樣。後嚟就愈來愈多酒店加設卡拉OK設備，而响當時來自港台嘅流行曲成為唔少人會唱嘅歌，可以話係兩岸三地文化交流嘅體現。
原圖：CCTV央視網