粥粉麵飯可以話係廣東人生活不可或缺嘅食品，唔少人覺得無飯飯麵麵落肚總係唔多安樂。講到食粥，唔少人都鍾意加多碟炸兩，貪佢又滑又脆，一個價錢兩種享受。咁史友們又知唔知，炸兩出現同廣州人一段痛苦經歷有關呢？
呢個痛苦經歷就係抗日時期廣州淪陷喇！响1938年，侵華日軍响廣州進攻，最後廣州市同周邊地區相繼淪陷。淪陷後嘅廣州物資短缺，大家生活上都相當艱苦，不過日常生活都仲可以有限度咁維持。當時廣州泮塘鄉有家小茶居名叫「嚼荷仙館」，點心師傅為應付當時物資短缺嘅情況，就諗出俾食客花最少錢，但同時可吃到腸粉同油炸鬼兩款美食，於是就創造咗炸兩，即係將腸粉包住油炸鬼。結果一推出就大受歡迎，更重要嘅係可以將隔夜油炸鬼以好合理方式清晒。後嚟呢種美食就流傳去珠三角各地包括香港，成為珠三角一帶流行嘅食品喇！
原圖：gd.gov.cn