最近天氣又凍凍哋，個日行過蛇羹鋪生意好到不得了。當然！天生好怕蛇嘅阿史經過門口未見蛇已經好驚....
蛇羹可以話係粵菜中一款特色菜，廣東位處嶺南，和暖多雨天氣就令唔少蛇响廣東生長，因而令廣東人有食蛇嘅習慣。亦由於廣東蛇羹咁出名，所以自古以來都有唔少外地人嚟到廣東後會品嚐一下呢道佳餚，包括宋代大文豪蘇東坡。據宋人朱彧所撰嘅《萍洲可談》，就寫咗個關於蘇東坡同蛇羹之間嘅故事。相關故事係咁：「廣南食蛇，市中鬻蛇羮。東坡妾朝雲隨謫惠州，嘗遣老兵買食之，意謂海鮮。問其名，乃蛇也。哇之，病數日，竟死。」蘇東坡被貶至惠州，有一日就响當地叫手下買蛇羹番嚟，其妾朝雲原本以為食緊海鮮，點知原來係蛇，大驚之後病咗幾日，之後死埋。係咪真係唔知，不過都反映出古時廣東一帶居民已經有食蛇習慣。
有趣嘅係，响古代啲文人有時會將蛇寫成為「龍」，好似南朝梁人任防响《述異記》就有載：「大雨，一青龍墮於宮中，帝命烹之，賜群臣龍羹各一杯。」「青龍」其實係條青蛇，而「龍羹」就係蛇羹。
原圖嚟自網絡