話說阿史有一日去買早餐，忽然好想食隻糯米雞，可能太耐無食先發現依家啲糯米雞原來貴咗咁多，真係估唔到糯米雞都變早餐豪食。
糯米雞可以話係粵式飲茶文化當中一個王牌點心，因為有餸有飯又惹味又飽肚，成為唔少人飲茶時必點之選。話時話，明明係荷葉包飯又點解叫做「雞」呢？阿史搵過資料，其中最多人講嘅講法係話响以前廣州有一位响畔溪一帶賣雞嘅雞販，有一天將賣剩嘅雞蒸俾家人食，點知唔小心將盛雞嘅盤打爛咗。由於當時百姓生活窮苦，家中無咁多容器，於是雞販就將雞肉切塊調味後同家中嘅米飯一齊蒸咗佢，後嚟發現味道好好，於是就將呢種滑雞蒸飯拎出賣，仲大受歡迎。後嚟其他食肆小販相繼模仿，慢慢就成為咗糯米雞喇！
不過，阿史就聽過一位廚藝界老行尊講，糯米雞由來其實係由以前食肆剩菜剩餸或切剩材料所製成，點解叫做「雞」有兩個原因，一個係裡面真係有雞肉，另一個原因就係商家改個靚名就可以冠冕堂皇咁賣俾食客。當然！今時今日糯米雞製作自然乾淨衛生好多，同埋夠晒足料。
原圖嚟自網絡