飲啖茶食個包，一盅兩件，可以話係廣東人特別係珠三角一帶居民嘅悠閒飲食文化。相信史友們都知道香港粵菜文化其實係由廣州傳到過嚟，因為香港响昔日係省城（即廣州）一個縮影，茶樓同酒樓文化都係廣州傳至香港。
講到廣州昔日著名粵菜食肆，當地就有四大園林酒家，分別係北園、泮溪、南園同東湖。呢四間酒家，可以話係老字號，又可以唔算好耐歷史。最早開業就係北園酒家，响1928年開業，由當時的商會會長鄒殿邦出面集資創辦。呢間酒家位置當年算係廣州北郊，所以就有「山前食肆，水尾茶寮」之稱。响十幾年後，位於荔灣一帶嘅泮溪酒家開業，都係以園林風格而馳名。到咗上世紀六十年代，海珠一帶嘅南園酒家同埋東山一帶嘅東湖酒樓先後開業，都係以園林為主軸，食客們一邊食一邊欣賞下庭園風光，都相當寫意。特別係北園酒家，响民國時期受惠於廣州繁榮富裕，成為咗城中富商名流聚腳之地。
不過响今時今日，廣州四大園林酒家就只係剩返三間，因為東湖酒家响2008年結業。
原圖嚟自網絡