上次介紹咗廣東人好鍾情嘅老火湯，今次阿史就想介紹廣東人飲食文化當中另一瑰寶，就係涼茶。
廣東人飲涼茶嘅歷史源遠流長，不過到底涼茶係幾時响廣東出現就未有一個統一講法。講到同涼茶有關最早嘅故事，就關係到晉代醫藥家葛洪。話說葛洪當年由北方到南方，响依家廣東地區修練，但由於南方氣候又濕又熱，於是佢佢就研發咗一啲用平價材料煲嘅涼茶，有病醫病、無病強身，改善咗啲人嘅健康情況，飲涼茶亦成為唔少南方人嘅生活習慣。
故事還故事，而最早有記載涼茶嘅文獻，就係元代釋繼洪撰修嘅《嶺南衛生方》，佢以涼藥「以生姜附子湯」一劑，清利膈脘，服後胸膈清涼。响清代何夢溪就寫咗《醫碥》，當中有記載：「按薛立齋治一老人腎虛，火不歸精，或時喉間如煙火上衝，急飲涼茶少解。」喉間如煙火上衝，睇落就似係熱氣搞到喉嚨痛，所以要急飲涼茶解解毒。
由以上故事同文字記載，就證明咗廣東人都好早已經有飲涼茶習慣。
原圖嚟自網絡