講到長沙呢個地方，相信史友們都會諗起湖南省會長沙市，玩開三國遊戲就會諗起孫堅响長沙一帶盤踞。其實响古代長沙呢個概念就同今日長沙有啲唔同，包括古代長沙嘅範圍，南及至依家廣東一帶。
响古代長沙指嘅唔係一個都城咁簡單，當中仲包括咗一個郡，據明朝編修《長沙府志》所載，秦代長沙郡下設湘、羅、益陽、陰山、零陵、衡山、宋、桂陽等縣，範圍除咗包括咗今天整個湖南省，連廣西、廣東、江西部分地區都包括在內，而湘就係今日長沙市一帶。到咗西漢初年因為行郡國制，所以呢一帶就設立咗長沙國，漢代開國功臣吳芮被封為第一任長沙王。到咗漢景帝，將武陵郡、零陵郡同桂陽郡三地重新劃俾長沙國管轄，長沙國控制範圍相當於今天湖南省以及湖北、貴州、廣西、廣東同江西部分地區，廣東範圍大概係今日粵北地區。所以話，古代嘅長沙，其實同嶺南地區關係好密切。
原圖嚟自網絡