喺好多昔日歐洲列強嘅博物館當中，例如大英博物館、法國國家圖書館、池努奇博物館以至美國三藩市亞洲藝術博物館當中，都收藏咗海量嘅中國文物，當中為數唔少都係八國聯軍掠奪嘅文物。但到底呢啲文物當時又係點樣流失到海外呢？近日德國嘅七間博物館就聯合做咗一次有系統嘅調查，阿史今次就同大家講一講啦！
近日德國七家博物館就開展咗一個名為「追蹤義和團文物」計劃，當中就試圖想探索1900年後從中國掠奪而來嘅館藏品。參與計劃嘅七家博物館就有柏林國家博物館下屬嘅亞洲藝術博物館和民族博物館，漢堡MARKK博物館、漢堡工藝美術博物館、萊比錫格拉西應用藝術博物館、法蘭克福應用藝術博物館，以及慕尼克五大洲博物館。
相關計劃早喺2021年底就啟動，係西方世界首次有系統咁對八國聯軍侵華戰爭後嘅流失文物進行研究。德國方面就挑選咗70件有代表性嘅文物，包括瓷器、佛像以及畫卷，並將這份名單提交給中國故宮博物院進行共同研究，預計年底就會有具體嘅結果。
目前為止，就可以得知喺八國聯軍之時，德皇威廉二世（William II）一共派出2萬名士兵到中國，而呢班士兵喺瓜分戰利品過程中，取得大量紫光閣文物，呢一點就由出自紫光閣蒙古王子柯基亞姆贊像（現收藏於柏林一家藝術品經銷商）以及兩幅精美中國功臣畫像（現收藏於德國民族博物館中國展廳）可以得知。除此之外，德國民族博物館以及德國亞洲藝術博物館仲收藏咗幾十幅紫光閣功臣像。紫光閣恰好位於德國佔領區，其中保存嘅上百幅畫像都喺呢段段時間內遺失並且流入德國藝術市場。
據估計，除咗民間私人收藏家手中嘅文物，單係德國博物館可能擁有數千件來自義和團時期文物，返還文物似乎正係未來需要探討嘅議題。
原圖嚟自網絡