喺形容他人嘅文章內容空洞，缺乏真實情感嘅時候，今時今日大家都會用到「八股文」一詞，之不過喺歷史上「八股文」並唔係一種簡單嘅文體，而係明清科舉所規定嘅一種文體，其複雜以及嚴謹嘅程度亦都唔係一般人能夠寫得到！
「八股文」又稱為股賦、四書文、八比文，要知道中國古代早喺隋唐時期就出現開科取士嘅科舉制度，而當時科舉中所寫嘅文章部分（明經）主要係寫詩歌，之不過喺北宋時期王安石就認為唐代以詩、賦、帖經取士，浮華不實，理應改試經義。而喺宋朝嘅科舉，考試嘅文體實際上係冇規格要求，但就慢慢開始有考生嘗試運用排比筆法撰寫文章，呢種文體亦被視為「八股文」嘅開端。
直到明、清兩代嘅科舉，考試嘅文體先至正式轉為八股文。所謂嘅「八股文」中嘅「八」正係指文章內嘅八個部分分別係破題、承題、起講、入題、起股、中股、後股、束股等部分；至於「股」正係「股者，對偶之名也」，意指起股、中股、後股、束股四段當中必需要有兩股排比、對偶文字，此平彼仄，兩兩相對，所以先至合稱「八股」。
「八股」題目都係取自四書，仲需要根據宋代朱熹《四書集注》等書作答，並唔允許作者自由發揮，而且全篇文章內容都有嚴格格式以及字數要求，所以呢種考試制度都係為人所詬病。
原圖嚟自網絡