盜挖、倒賣文物嘅案件向來都係好難追查，但對於呢啲侵害民族利益、國家歷史嘅行為，就絕對應該強烈打擊。近日河南洛陽市公安局就公布咗一個消息，就係通過一件「昭君出塞」銅鏡作為線索，喺歷時兩年嘅時間當中就成功破咗一單特大倒賣文物案，全案總計追回5000餘件文物，逮捕59名嫌疑犯，目前已有33人遭判刑。
案中嘅重點「昭君出塞」古銅鏡來頭一啲都唔簡單，呢件文物嘅年代就應該係屬於東漢時期，要知道喺古代嘅文物當中並唔係經常可以見到「中國」二字，但呢塊銅鏡上嘅銘文就清晰刻住「倍去中國事胡人」以及「兵革不用中國安」等字眼，並且清晰記錄咗昭君出塞嘅史實，唔單止有極大嘅歷史價值，而且仲係極為罕見。咁到底呢件文物又係點樣成為破案關鍵呢？
原來洛陽市公安局早喺2021年就已經立案對呢一系列嘅特大倒賣文物案進行調查，過程中就發現有一位莫姓嫌犯供述廣西荔浦市嘅郭某強經當地孫某桂介紹，先係以8萬人民幣買咗桂林市平樂縣貨主手中嘅「昭君出塞」銅鏡，而銅鏡後來就受郭某強委託送往長沙出售，最尾就以1000多萬元人民幣賣咗畀廣東商人駱某，連帶仲令到桂林市平樂縣四名涉嫌盜掘、倒賣「昭君出塞」銅鏡嘅團伙曝光，繼而仲查出案件涉及5000餘件文物，其中一級文物8件，二級文物67件，三級文物592件，一般文物4380餘件，以及古錢幣54.2公斤，數量真係極為誇張。
結果，經過兩年幾時間、排除過億條線索後，公安局就成功查清犯罪網絡框架，追回國家級嘅文物，真係一個好消息！
原圖嚟自網絡