嘩嘩嘩，三星堆呢個世界級嘅考古遺址真係不斷可以解鎖一啲破天荒嘅成就！近日四川省考古研究所就公佈咗一則消息，就係三星堆遺址祭祀區再次成功跨坑拼對兩件大型青銅器，阿史今次就同大家講一講啦！
隨住三星堆遺址祭祀區野外工作全面結束之後，考古團隊嘅工作重心就重新放喺整理呢啲出土文物之上。要知道喺三星堆出土嘅器物當中，唔少都器物都因為各種原因而破損，但到底可以點樣分得清每件碎片係屬於邊件器物呢？近日考古團隊就利用咗三維掃描以及3D模型等科技手段，令到原本分離喺唔同祭祀坑嘅器物「破鏡重圓」，再次成功「合體」。
呢兩件器物就分別係銅獸馱跪坐人頂尊銅像及銅罍座倒立鳥足頂尊神像。先講講銅獸馱跪坐人頂尊銅像，呢件器物就一共分成上、中、下三部分，分別係2021年三號「祭祀坑」出土嘅銅頂尊跪坐人像、1986年二號「祭祀坑」出土嘅銅尊口沿以及2022年八號「祭祀坑」出土嘅銅神獸。喺當年呢啲文物出土之時，大家都唔會幻想佢哋係可以拼成一件，但結果就係上、中、下三部分分體之後，就可以塑造出一個通高1.589米嘅銅像。而成個銅像就係還原返一個巫者跪喺神獸背上嘅景象，而巫者頭頂銅尊就會用嚟放置祭品，甚具古蜀特色。
至於銅罍座倒立鳥足頂尊神像就更為誇張，呢個銅像通高2.53米，係由1986年二號「祭祀坑」出土嘅銅鳥足人像、2021年三號「祭祀坑」出土嘅爬龍銅器蓋、2022年八號「祭祀坑」出土嘅銅頂尊撐罍曲身人像、銅持龍立人像、銅杖形器等「合體」而成，涉及嘅部件眾多，可想而知當中嘅複雜程度。而喺成功拉接之後，大家就可以睇到一座彰顯古蜀文化本色嘅高大青銅祭祀神像，既有曲身人像呈鳥體獠牙嘅神面姿態，神壇主體架構又有罍型底座以及主幹觚形尊，真係鬼釜神功！
原圖嚟自網絡