香港長洲尋日嘅太平清醮有飄色同搶包山嘅重頭戲，吸引唔少人參與。而响同一日，澳門亦舉行民間傳統節慶活動「醉龍節」，街道有舞龍舞獅表演同巡遊等等，真係好熱鬧。

澳門魚行醉龍節係澳門鮮魚行獨有嘅傳統節慶活動，又叫做澳門魚行醉龍醒獅大會，被列入國家級非物質文化遺產。每年四月初七嘅傍晚，澳門做魚業批發或者零售嘅居民，都會聚埋响街市，席地而坐，圍埋張枱食飯，期間大家仲會舞動木龍祈福，形成「龍船頭長壽飯」傳統。

到咗四月初八，佢哋會响澳門三街會館舉行舞醉龍醒獅活動，進行祭祀、舞醉龍醒獅表演、街道巡遊等儀式，更加會派發龍船頭飯，將健康長壽嘅祝福同大家分享。尋日澳門排隊攞龍船頭飯嘅居民，足足圍繞街市外圍一圈，墟冚程度猶如長洲排隊攞平安包。

叫得做醉龍節，又點可以唔提舞醉龍同舞醒獅呢兩項焦點，根據明代黃佐嘅《廣東通志》，最早嘅醉龍舞蹈係响中山（香山縣）長洲村興起，祈求風調雨順。據講舞醉龍只有龍頭同龍尾，並無龍身，表演者會沿路一邊飲酒噴酒，一邊舞醉龍，演繹出朦朧醉態。

有資料話，其實醉龍節源於一個傳說，話說當年有個飲醉酒嘅和尚响森林遇到蟒蛇，用醉拳打贏咗之後，將條蟒蛇斬成三碌，仲將條蛇舞嚟舞去。蛇血流入河流，後來生咗一種樹（有無咁快？！），用河水浸泡啲樹葉，飲完就百病全消，所以居民就將條蟒蛇奉為神龍，年年祭祀。

點都好，醉龍節都係一項特色傳統，唔知阿史下年有無機會同朋友一齊去呢？