講親順德美食，一定唔少得牛奶，阿史對大良炒鮮奶慕名已久，之前做嘢有機會去新蒲崗，見到有呢味餸食，阿史梗係要第一時間入去食返碟喇！

一上菜，個賣相已經相當吸引，食落好嫩滑而且好香奶味！阿史本嚟以為大良炒鮮奶係甜嘅，但估唔到上面鹹鹹地嘅粒粒同鮮奶好夾~~呢道大良炒鮮奶係順德大良首創，雖然只係有七十幾年歷史，但好多廣東省地區都有得食，係中國烹飪技術入面「軟炒法」嘅經典菜式，主要用牛奶、蛋白嚟炒，經常同佢一齊炒嘅配料有雞肝、蟹肉、蝦仁、火腿等等。阿史今次試呢碟鮮奶入面係冇配料嘅，唔知加啲配料入去炒會唔會好食啲呢？