脆肉鯇——肌肉版鯇魚

早兩日成班人打邊爐（識打梗係夏天打），居然無阿史必食嘅脆肉鯇，搞到阿史有啲失望，到喉唔到肺嘅感覺。脆肉鯇相信有唔少人食過，究竟係點養同點食？

脆肉鯇其實係普通鯇魚嘅「進化版」。話說响70年代，有人用中山嘅長江水庫嘅水嚟養鯇魚。點樣令鯇魚變成肌肉版？好似男史友想變大隻，就會食蛋白粉同做gym，而鯇魚都要食，不過係食蠶豆，食120日左右，可以提高魚肉嘅蛋白質及礦物質，再加上適當嘅水溫、氣候條件同生長期等等，令肉質變得爽脆同結實。

「脆鯇滾一滾，神仙都企唔穩」，其實除咗打邊爐，豆豉蒸脆鯇魚腩都啱阿史口味，原汁原味又脆卜卜，最緊要係無泥味。雖然睇過同蔡瀾嘅相關報道，講到脆肉鯇可以做刺身，不過阿史就唔係好敢食，其實炒球同椒鹽都好好食，唔一定要生食嘅。