早兩日成班親戚朋友去酒樓食飯，貪過癮叫咗碟芝士龍蝦伊麵，啲伊麵吸收曬啲龍蝦汁同芝士味，簡直一絕。飽暖吹吹水，席間有朋友問，究竟伊麵由邊個發明？大家又識唔識答？

據講伊麵嘅出現同清代官員伊秉綬有關，佢當年去到惠州做知府時，成日响屋企招待唔少文人墨客，搞到屋企個廚師忙到一頭煙。為咗等賓客可以醫肚，佢就叫廚師用麵粉加鹼水同雞蛋（或鴨蛋）撈勻，整成麵條捲埋成餅咁款，再拎去炸，然後收埋備用。等客人嚟到，將個麵用水一煮，加埋配料就搞掂。

當時書法家宋湘都係有份食嘅座上客，食完覺得好好味，問伊秉綬隻麵叫咩名，當佢知道如此美味嘅麵居然無名，就提議叫「伊府麵」，亦即係今日大家食到嘅伊麵喇~