宜家普遍對對聯用嘅都係書面語，有無諗過廣東話咁㜺鬼，對起對聯上嚟仲更加有韻味呢？廣東有個才子，擅長用廣東話做對聯，生動㜺鬼，佢就係何淡如喇。

何淡如係佛山南海人，曾經喺讀書果陣幫人做槍手而被開除學籍，佢中過舉人，先喺廣東肇慶府高要縣做過教諭，跟住去咗廣州開課授徒，後來嚟咗香港九龍教書。何淡如嘅堂生動有趣，好受學生歡迎，而佢喺學生文章上面嘅批文亦十分得意。話說有學生嘅文章批文寫住：「或明日搭度過佛山」，學生一頭霧水，走去問點解，何淡如即刻答返佢：「我嘅批語你睇唔明？你嘅文章我更加睇唔明。」何淡如又試過喺學生文章度留言：「去橘香齋買包甘露茶煲來飲下去」，甘露茶專治傷風氣逆，何淡如巧妙咁利用甘露茶嘅功效嚟諷刺文章嘅文氣唔順，要飲涼茶嚟順返條氣，認真㜺鬼。

何淡如唔單止識教書，佢仲好有急才，有「怪聯聖手」、「廣東諧趣通俗文學家」嘅稱譽。佢寫嘅對聯非常妙，例如講路人打架嘅「一拳打出眼火，對面睇見牙煙」、描寫嫁女嘅「打鼓打鑼，不過戥人高興；搬埕搬塔，總之自己破財」、講睇戲嘅「睇唔真咪嘈，請問前頭個位高見者；企得穩便罷，留番餘地讓俾後來人。」廣東人一睇就明，仲夠晒朗朗上口。

通常啲人爭住認第一，點解有人爭住認第尾？何淡如有「第尾才子」之稱，唔好以為講佢好差，其實意思剛剛相反。何淡如認咗第尾，慘過認左第二無人敢認第一，因為佢「承包」第尾，搞到第九百九，九千九百九十九都無人敢認，尾二就更加唔駛講啦。 　

不過，何淡如嘅對聯雖然喺民間流傳甚廣，但就難入文人大家之眼，佢嘅對聯被視為「非大雅之作」，阿史不得不歎句：走曬寶。

#廣東講西