一講廣東省城市，未必人人會諗起惠州，但其實香港同惠州嘅距離不算遠，就算係今日搭直通巴士都只係兩個半鐘左右，第時高鐵開通，往返時間仲可以縮短一半以上。作為粵港澳大灣區城市之一，惠州更被賦予成為「廣東矽谷」嘅硬任務，大家對呢個城市又會唔會加添幾分好奇呢？

以往惠州嘅產業以工業為主導，當中又以電子製造業佔據最大份額，一啲外資電子企業，包括通用、索尼、日立、松下、LG、三星、西門子、NEC等國際知名品牌亦有喺惠州投資。不過話明係「廣東矽谷」，咁梗係唔可以剩係得「製造」，仲需要有「創造」，於是項目總投資額達3,000億元人民幣嘅惠州潼湖生態智慧區就應運而生。由2014年起，思科潼湖科學城、哈爾濱工業大學國際教育科研基地等8個重點項目已先後落戶惠州潼湖生態智慧區，而碧桂園集團，亦喺嗰到投資最少300億元人民幣，發展名為「創新小鎮」嘅首個科技小鎮，建設以物聯網及大數據為產業主題嘅首個社區。

除咗現代科技，其實惠州也蘊藏唔少歷史文化色彩，唔講唔知，原來北宋大詩人蘇東坡當年就曾被貶去惠州。