阮玲玉，一個默片時代嘅巨星，一個家傳戶曉嘅時代傳奇，但就喺花樣年華之中了結咗自己嘅生命，為後世留低好多謎團同歎息。阮玲玉逝世之後，佢嘅傳奇一生成為電影、小說、話劇戲曲嘅創作題材。香港導演關錦鵬同梅艷芳合作《胭脂扣》之後，再為梅艷芳度身打造《阮玲玉》，因為關錦鵬認為梅艷芳同阮玲玉嘅出生背景有好多相似之處，而且梅豔芳同阮玲玉一樣，係一個時代嘅代表。但後嚟梅艷芳推咗《阮玲玉》，改由張曼玉「執二攤」。張曼玉演繹嘅《阮玲玉》，傳神咁重現咗呢位一代紅星嘅魅力同哀愁，而佢更憑住呢套1992年上映嘅《阮玲玉》，獲得第十二屆金像獎最佳女主角，仲係金馬獎同柏林影展度大放異彩。

講返阮玲玉本人，佢1910年喺廣東中山出生，由於父親早逝，所以喺佢6歲嘅時候，母親就帶住佢去大戶人家——張家度做傭人，令阮玲玉識咗大佢三歲嘅張家四少爺張達民。張達民係紈絝子弟，喺阮玲玉15歲果陣已經對佢展開熱烈嘅追求。

當時，年紀輕輕嘅阮玲玉已經成功投考成為演員，初期演出過鴛鴦蝴蝶派嘅言情片，甚至神怪武俠片。阮玲玉喺1930年加盟由黎民偉等人成立嘅聯華影片公司之後，開始參演比較嚴肅嘅電影，仲同唔少名導演合作過。當時佢喺電影《野草閒花》度飾演賣花女，呢個角色令佢一夜成名，奠定咗佢喺影壇嘅地位，更成為果個時代入面中國影壇最突出嘅明星之一。佢一生主演咗29部電影，代表作有《小玩意》、《神女》，同遺作《國風》等等。

隨住阮玲玉嘅名氣越來越大，張達民開始露出本嚟面目，洗晒啲遺產之後仲不斷向阮玲玉索取金錢，種種騷擾同折磨，令阮玲玉不勝其煩。後嚟阮玲玉識咗茶葉大王唐季珊仲同佢同居，但唐季珊本身已經有妻室。面對張達民嘅苛索、唐季珊嘅不忠，同埋傳媒嘅糾纏，阮玲玉最終喺1935年吞安眠藥自殺，離世時僅24歲。

據媒體報道，阮玉玲死前有留低遺書，寫住「人言可畏」，但後嚟被指係偽造。關於佢自殺嘅原因，外間眾說紛紜。魯迅曾經寫咗篇《論人言可畏》，認為「她的自殺，和新聞記者有關，也是真的。」阮玲玉逝世後，30萬民眾前往殯儀館同墓地，憑弔隊伍超過十公里，場面壯觀。美國《紐約時報》仲將呢篇報導刊喺頭版，話呢個係「近代國際上最大嘅葬禮」。