睇新聞會不時睇到，中國古代陶瓷製品喺拍賣會上被爭相競投，有時仲會以天價成交，可見中國陶瓷有佢嘅收藏價值同獨特魅力。咁大家有冇諗過，呢啲做工精美嘅瓷器係嚟自邊度？要數製造瓷器嘅地方，除咗景德鎮之外，佛山石灣嘅陶瓷同樣馳名中外，佛山更因此有「南方陶都」嘅美譽。

早喺秦漢時期，石灣嘅製陶技術已經達到一定水平，喺石灣瀾石大蟲崗古墓群嘅東漢古墓裏面，就發現陶罐、陶壺等文物。到咗唐宋時期，石灣製陶業出現咗第一個黃金時期。果陣嘅石灣出現大型窯場，以生產青釉、醬釉為主。同時，石灣陶瓷係當時嘅其中一種出口貨品，透過鄰近嘅國際級貿易大港廣州，輸出到其他國家。

石灣製陶嘅另一個製陶黃金時期就係明清時期。明代果陣石灣變成民間陶瓷商品生產嘅集中地，加上石灣陶瓷製造技術日趨成熟，令石灣陶瓷成為上佳嘅工藝品。《明詩綜》有載：「石灣瓦，甲天下」，反映咗當時石灣陶瓷已經馳名中外。喺明清年代，佛山石灣仲出現咗好多大型龍窑（窑爐嘅一種），龍窑通常依山而建，好似巨龍從天而降咁，所以就有呢個名。喺清代，石灣一共有成107座龍窑，包括現存嘅南風古灶同高灶，可見果陣製陶嘅風氣之盛。

南風古灶建於16世紀明代正德年間，宜家已經變成一個旅遊景點，集旅遊、觀光、生產、習藝、研討、參與、購物於一身。石灣人以前將窯叫做「灶」，南風古灶個爐口對住正南方，南風會順窯口而入，令個火好容易點著、燒旺，於是就有咗呢個名。南風古灶嘅窯火已經燒咗500年，從未間斷過，所以被列入健力士世界紀錄。景區內仲有古鎮陶源史畫、古窯映像、古寮場等景點，遊客喺觀光遊覽之餘，仲可以玩陶同燒陶添。