上次講到最初提出廣東改革理念嘅習仲勛，後嚟被調返去中央，於是呢個任務就落咗喺任仲夷同梁靈光身上喇。

任仲夷原本係遼寧省委第一書記，原先佢有意推動大連市成為經濟特區，但後嚟中央調派佢去廣東，出任廣東省省委第一書記。至於梁靈光，佢原本係國家輕工業部嘅部長，由於任內對恢復國家輕工業方面有一定政績，所以被調派去廣東，出任廣東省省委書記（1983年仲出任埋省長兼廣州市委第一書記）。

任、梁嚟到廣東之後雖然有改革嘅決心，但响八十年代初果陣嘅環境下，要搞好廣東經濟真係甚艱難。改革開放之下，點樣將計劃經濟同市場經濟接軌係一個大問題，而改革開放初期嘅其中一個重大問題就係物價通脹。當時任仲夷同梁靈光係廣東逐步開放物價，刺激居民物資流動同埋對生活需求嘅積極性，等廣東慢慢咁同市場經濟接軌。不過，當初開放物價都係有相當大嘅阻力，梁靈光生前曾經憶述，當時一條魚嘅價格一下子由幾毫子升到五、六蚊一斤，唔係一般老百姓可以承擔到嘅。但經過三年之後，改革有咗初步成果，經濟好咗，廣東就成為咗新鮮魚最多、價格最平嘅地方。

除咗開放物價之外，任仲夷仲提出改革基建投資體制，改變單靠財政撥款嘅模式，最後廣東省政府仲創造出「貸款修路、收費償還」嘅新方法（即係宜家大陸好多路段都設有嘅收費站，向經過嘅車收路費嚟興建、維修、保養公路）。1984年1月1號，廣深鐵路公司成立，自主經營自負盈虧，打破咗國有企業模式，「廣深模式」更加成為經濟承包管理體制嘅典範。另外，吸引港資僑資去廣東投資都是任、梁嘅一大功勞。當時廣東省政府推出好多優惠政策（例如延長合作期）俾港商、僑商，鼓勵佢哋回國投資建設。好似廣州市中國大酒店，花園酒店、白天鵝賓館等，就係港商、僑商投資嘅項目。

任仲夷同梁靈光喺1980年至1985年主政廣東期間，開創咗好多先例，同時為廣東經濟打咗良好嘅根基。