去旅行，梗係想吃盡地道小食。如果阿史話你知，只要揀啱時間去肇慶旅行，就可以免費白飲白食當地傳統小食，你又會唔會蠢蠢欲動？等陣，因為時機未到。

講緊嘅係肇慶高要地區嘅「茶果節」，茶果節又名「行村節」，係肇慶高要西南地區大部份鄉村嘅傳統節日，據講已經有成千幾年歷史，早年仲被列入廣東肇慶首批市級非物質文化遺產名錄添。

茶果節每年會係農曆正月，或二月初五、初八、初十等日子舉行，各個村舉行嘅日子都不盡相同，共通點都係節慶期間，村民會整茶果嚟招呼親戚朋友。作為遊人，據講只要「膽大心細面皮厚」，向主人家自我介紹一番，當地人都會用美食熱情招待。

肇慶嘅茶果，同香港人平日食開嘅茶果完全唔同。肇慶的「茶果」，包括瀨粉、薄撑、裹蒸、入口角、白水仔、水菱角、芋團、煎堆、水欖、湯粉、甜糕、番薯拌粉、湯圓等等，都係「茶果節」嘅主角。

至於點解會有茶果節呢？據《高要文史》記載，茶果節源於唐朝末年，當年好多中原人士為咗逃避戰亂，大批大批咁遷移到高要宋隆河流域一帶生活，不過果度每年都一定會有水災、旱災、瘟疫等自然災害，村民就用稻米粉蒸熟整成一種叫做「茶果」嘅點心供奉靈神，祈求村入面嘅人身體健康，天災唔好再嚟。

稻米粉整嘅茶果？係啊，就是類似香港人平日食果啲茶果啊，係咪突然多咗幾分親切感呢？

茶果節有成千年歷史，同樣係肇慶入面嘅封開聖妃誕都同樣有千年歷史。相傳，喺秦漢時期，封開有個歌仙叫劉三妹（有指同廣西歌仙劉三姐係同一個人），賢淑端莊，而且能歌善舞，後來更加同一位王子共偕連理，被封為「聖妃」。不過，就算貴為「聖妃」，劉三妹依然成日登上斑石山山頂唱歌，鼓勵村民戰勝旱情，祈求五穀豐登。「聖妃」後嚟成仙，村民為咗紀念劉三妹，就喺斑石山下面起「聖妃宮」，每年農曆三月初三聖妃誕辰同九月十九，各方遊客、民眾都會去拜祭祈福。