好多人對佛山嘅第一印象，就係好打得。梗係啦，佛山出咗兩位武術名家——黃飛鴻同葉問喔！其實佛山除咗功夫了得之外，仲有樣嘢「好打得」，就係佢嘅經濟。佛山喺2017年地區生產總值（GDP）達到成9549.6億元人民幣，喺廣東省嘅排名僅次於廣州同深圳。除此之外，佛山更加係企業搖籃，唔少著名企業好似家電巨頭美的集團、經營房地產嘅碧桂園、服裝品牌李寧、飲料品牌健力寶等等，都係嚟自佛山。

歷史上，佛山係中國較早對外開放嘅商埠之一，其後喺改革開放時期，仍然係中國較早嘅商品出口基地之一。佛山宜家有5個市轄區，包括禪城區、順德區、南海區、三水區同高明區。喺經濟發展方面，南海區同順德區截然不同，順德主要靠大企業，南海就靠龐大嘅中小企業群，創造龐大產值，並發展一鎮一特色，例如成個鎮做陶瓷、紡織品、金屬製造、汽車配件等，以聚落優勢培養產業發展。至於順德區，鄧小平喺1992年南巡果陣講過：「順德的思想要更解放一點、膽子要更大一點、腳步要更快一點。」就係因為呢一句，令順德人打出「敢為天下先」嘅口號，作出大膽嘗試，將本嚟屬於政府國有嘅鄉鎮企業民營化，最出名嘅個案就係美的集團。美的集團由當年一間小小嘅家電廠，靠體制改革，國有轉民營，再奮力追趕市場機會，搖身一變，就變成咗家電行業嘅龍頭企業。

廣東近年啟動「騰籠換鳥」政策，指嘅係珠三角動密集型產業向粵東、粵西及粵北山區轉移，為產業結構高度化、高級化留出空間。佛山都唔例外，當地拆除咗高污染工廠，鼓勵智能製造，包括發展人工智能。

除咗發展智能製造，佛山嘅重點產業仲有設計業。當地政府出資籌建創意基金，唔單止強化製造力，仲致力升級技術同設計範疇。佛山亦打造創意基地，吸引唔少工業設計師同設計團隊進駐，成為製造業發展嘅一大助力，更開啟經濟新格局。之前去參觀佛山廣東工業設計城嘅習近平提到，「希望佛山成為設計城，佛山製造變成佛山設計，並希望下次再來佛山的時候，廣東工業設計城有8000個設計師。」由此可見，佛山係經濟上可謂潛力無限。