今時今日要大家「磨硯練字」簡直係天方夜譚，電腦、手機等高科技產品普及之後，好多時都唔洗用筆嚟寫字，更何況係「練字」？不過，普唔普及同有冇人識係兩回事，識書法呢門「國術」嘅大有人在，好似劉德華、成龍、鍾鎮濤同著名導演徐克，全部都係書法大行家，可見只要係好嘢，就點都可以傳承落去。講到中國書法，梗係要提墨硯，而離香港都唔算太遠嘅肇慶，正正係「硯中貴族」嘅出產地。

肇慶古稱「端州」，所以製造出嚟嘅硯統稱「端硯」，佢同歙硯、洮河硯、澄泥硯被評為「中國四大名硯」。端硯自唐朝開始就喺「貢硯」，價值不菲。唐太宗自己好中意書法家王羲之嘅書法，曾經叫人將「初唐四大書法家」之一嘅褚遂良臨摹嘅《蘭亭集序》刻喺端硯上面，當係賞賜咁賜俾魏徵。武則天都曾經將刻有「日月合璧，五星聯珠」嘅端硯賜俾狄仁傑，但狄仁傑一生清廉，受賞之後得知採石工作艱辛，竟然上奏請求減少貢品數量。

不過，喺唐代果陣端硯未成為一門工藝品或者藝術品，仲係以實用為主，簸箕形就最常見，特點係儲墨量好多，有指同唐代書法家輩出，經常需要書寫大字有關。去到明清兩代，製作端硯嘅技巧達到頂鋒，呢個時候嘅端硯再無定型，工匠會根據端石本身嘅結構去構圖，花草樹木、飛禽走獸蟲魚、日月風雲等等咩都有，而且普遍有吉祥含義。

端硯由實用品發展成工藝品，原來仲有一段故！據說（當然係傳說），唐朝中葉，一位老硯工路經端溪（製作端硯石質最好嘅地方），見到有兩雙仙鶴飛落溪水度，好耐都冇離開，老硯工喺好奇心嘅驅使，竟然嘗試用網捕捉仙鶴，撈起嘅居然係一塊石頭，呢塊石上面有裂縫，仲不時發出鶴鳴（吓？）。老硯工將佢撬開，呢塊石即刻一分為二，變咗兩個硯臺，每邊都有一隻仙鶴企喺蒼松上面嘅圖案。自此，硯工紛紛開始喺硯度雕上各種圖案。

講到這裡，只可以話：信不信由你。傳說歸傳說，高質素嘅端硯已經成為國寶級嘅藝術品係不爭嘅事實，郁啲就要成百萬，實在唔係阿史呢啲窮苦人家可以買得起嘅玩意。