名作家金庸嘅武俠小說多以歷史素材為背景，當中耳熟能詳嘅《碧血劍》描寫明代將領袁崇煥兒子袁承志嘅故事，金庸喺1975年更寫下《袁崇煥評傳》，作為《碧血劍》嘅補充。

相信有睇金庸啲小說嘅史友都知，《碧血劍》入面，袁承志父親係袁崇煥，取名「承志」是因為希望佢「繼承父親遺志」。袁崇煥死後，他嘅舊下屬救出7歲嘅袁承志，後來仲教袁承志讀書識字數同打好武功基礎，以便承志日後為父報仇。書中描寫袁承志得到「金蛇郎君」嘅金蛇秘笈，學得一身好武功，及後成為武林盟主，助闖王起義及攻破明朝首都北京。2000年播嘅電視劇《碧血劍》，由早排成為影帝嘅林家棟飾演袁承志，仲有好耐無見過嘅江華做金蛇郎君，不過阿史最中意嘅，係古裝無敵手嘅吳美珩。

小說同電視劇嘅內容總係引人入勝，不過，袁承志响真實歷史上並唔存在。根據《明史》記載，袁崇煥無子，至於《清實錄》中更提及，因為堂弟袁文炳嘅兒子入繼，袁崇煥先有後嗣，所以袁承志只係金庸虛構出來嘅角色。

之前都提過，袁崇煥曾經參與過寧遠之戰、寧錦之戰等著名戰役，分別打贏咗努爾哈赤及皇太極。不過，明思宗中咗皇太極嘅反間計，誤信袁崇煥勾結皇太極，最終袁崇煥慘遭凌遲處死，直至到清朝乾隆年間先獲得平反。

袁崇煥被判凌遲處死之後，當時嘅百姓唔了解真相，以為袁崇煥通敵賣國，所以用錢買佢嘅肉嚟食，同手指差唔多大細，仲一邊食一邊鬧。袁崇煥處死當晚，一位姓佘嘅謀士冒死將袁崇煥嘅首級偷偷葬於家中，臨終前向後世子孫留下遺訓：一，要世世代代為佢守墓；二，唔准做官；三，唔可以唔讀書。自此，佘家後人秘密守墓，直到乾隆年間先轉為公開。從1630年至今，佘家嘅後代守墓近400年。