四十年前中央實施改革開放政策之後，廣東省成為中國最先進行經濟改革嘅地方。事實上，早喺1978年12月，中共十一屆「三中全會」之前，廣東要「改革開放」嘅思路就已經出現。而現任國家主席習近平嘅爸爸習仲勛仲同呢次廣東改革有好大淵源。

1978年4月，當時任職全國政協常委嘅習仲勛被獲任做廣東省第二書記。習仲勛去廣東上任之後，先後去咗寶安、梅縣、汕頭、惠陽等21個縣度視察。喺同年嘅十一屆「三中全會」之前，中央就已經先召開咗個多月嘅工作會議。會議期間，習仲勛喺《廣東的建設如何大幹快上》嘅工作匯報入面表示：「我們也希望，中央能給廣東更大的支持，同時多給地方處理問題的機動餘地。比如農業機械化，如果中央允許我們吸收港澳、華僑資金，從香港引進一批先進設備和技術，購進電力，進口部分飼料，就可以一方面先把國營農場、畜牧場、海水養殖場等武裝起來，作為示範，培養人才，取得經驗。」引入港澳僑嘅資金、技術等概念就係後來廣東省改革開放嘅一個重要元素。

1979年1月，已經成為廣東省第一書記嘅習仲勛，明確提出要充分利用鄰近港澳呢個有利條件，引進外資同先進技術設備。同年4月，習仲勛喺北京嘅中央工作會議上，指出廣東省同其他省份一樣缺少自主權，因此提出「希望中央給點權，讓廣東先行一步，放手幹」嘅意見。習仲勛嘅建議被中央領導了解之後，得到政治局常委嘅讚許同支持，連鄧小平都同意讓廣東同福建應該享有施政嘅靈活性，仲表示：「中央沒有錢，可以給些政策，你們自己去搞，殺出一條血路來。」

1979年7月，黨中央、國務院正式批准廣東喺改革開放中實行特殊政策、靈活措施，決定先喺深圳、珠海兩個市度先劃出部份地區試辦出口特區。於是喺1980年8月，第五屆全國人大常委會第十五次會議入面，《廣東省經濟特區條例》就被正式批准頒布。同年嘅11月，習仲勛調返去中央工作，廣東嘅改革開放工作後來就由任仲夷接棒。咁究竟任仲夷可唔可以擔此大任呢？下次講。