唔講或者唔知，廣東省西部重要城市──湛江市，以前叫做廣州灣，曾經喺19世紀末租借咗俾法國，直至二戰後中國先至收回。話說喺1897年，法國軍艦白瓦號進入廣州灣一帶避風，發現嗰度係天然深水港，認為可作為控制中國西南部嘅據點，有助對瓊州（即海南島）嘅控制，從而令法國喺中國西南以至中南半島北部嘅勢力能夠同英國抗衡。

於是喺1899年11月16日，法國同清政府簽訂《中法互訂廣州灣租界條約》，將遂溪、吳川兩縣屬部分陸地、島嶼以及兩縣間麻斜海灣劃為法國租界，統稱「廣州灣」，租借期限為九十九年，法國租借期間曾改稱做白瓦特城（Fort Bayard）。之後，廣州灣就成為一個貿易港，用來進行鴉片貿易。不過，法國方面並無好好管理呢個租借地，廣州灣總公使曾經仲抱怨廣州灣係「一處名聲狼藉嘅流放地」，鴉片貿易加上海盜橫行，廣州灣遠不及當時英國在粵嘅殖民地香港繁榮。

直至二戰期間，日軍1943年佔領廣州灣，強迫法國簽訂《共同防禦廣州灣協議》，廣州灣宣告淪陷。到咗1945年，中法兩國簽訂條約，廢除不平等條約，法國將廣州灣租借地歸還俾中國，中國後來將廣州灣改名為湛江。而家市內依然有唔少法式建築物，就好似呢座廣州灣法國公使署舊址。