唔少香港人都中意周末去珠三角一帶玩，當中「南番順」便是熱門地點。「南番順」其實係講緊南海、番禺、順德，又名三邑，既係珠三角嘅魚米之鄉，亦都係廣州地域文化發源地。其中「南海」更加早响二千幾年前已經出現。

秦始皇平定六國後，平定百越，並响嶺南地區設桂林、象郡、南海三郡。當時南海郡嘅面積，比現今嘅南海大得多，秦時南海郡下轄四縣，包括番禺、四會、博羅、龍川。據《漢書‧地理志》記載，漢時南海郡下設六縣，包括番禺、博羅、中宿、龍川、四會及揭陽。隋朝開皇十年，設置南海縣，縣署駐廣州，但去到唐朝時置廣州都督府，自此南海便成為一個縣。

提及南海，點都要講講西樵山。西樵山位於南海區西南部，西樵山古稱錦石山，因為古人會去東邊嘅羅浮山同西邊嘅錦石山採樵，故稱西樵山。西樵山係中國境內嘅宗教名山，自南漢後成為佛教勝地，有寶峰寺、雲岩寺、寶蓮寺、接承寺、白雲寺等，其中寶峰寺更係南粵四大名寺之一，可惜毁於明代，現時僅存斷牆殘壁。

「南番順」舊時嘅具體位置較現時嘅分區方法為大，位於廣州市同佛山市一帶。現時嘅廣州人都大多嚟自依三個縣，並視為祖藉。三縣同廣州地理位置相鄰，有深厚嘅歷史淵源，文化相近，所以三個縣被視為廣府文化發源地。由於南番順位於珠江三角洲一帶，物產豐富，亦被視為粵菜嘅重要源頭之一。