早排關於撥唔撥款起條港珠澳大橋呢個話題，引起香港人熱烈討論。其實呢條連接香港、澳門及珠海嘅港珠澳大橋，已經成為世界上最長嘅跨海大橋，雖然佢係喺2009年先開始動工興建，但實際上，早响上世紀八十年代，就已經有人提出要起。

呢個人就係港商胡應湘（香港地產公司「合和實業」嘅創辦人，廣深珠高速公路就係佢提出同投資興建嘅），早响上世紀八十年代，佢提出要興建一條連接香港同珠三角西部嘅跨海大橋。胡應湘曾經話，呢個構思係喺1983年提出嘅，佢搵咗當時嘅珠海市市長梁廣大討論，梁廣大都認為呢個係一個好好嘅方案。呢條跨海大橋嘅香港選點原本並唔係大嶼山，而係屯門嘅爛角咀。胡應湘嘅構思，就係通過呢條跨海大海，打通澳門同珠海，從而連接番禺、順德、中山、南海等地，將珠三角嘅海運、河運、陸運同埋空運集中係一齊，令香港成為珠三角嘅物流中心。不過，當時港英政府對興建呢條跨海大橋冇乜興趣，呢個構思當然就不了了之。

直至香港回歸之後，跨海大橋嘅構思重新得到重視，國務院更加喺1997年批准立項，可惜遇上金融風暴，計劃暫時擱置，直至2003年，興建港珠澳大橋計劃先得以落實。而果陣距離胡應湘提出興建大橋嘅構思，足足相差咗二十年。