上次講起舒特拉喺第二戰世界大戰中救咗過千個猶太人，唔講未必知，其實軸心國日本都有個「舒特拉」，同樣救咗唔少猶太人。

呢位「日本舒特拉」叫杉原千畝，佢喺外務省工作，1939年被派到立陶宛，獨自經營一人領事館。一年之後，同盟國陣營節節敗退，當時一批滯留喺立陶宛嘅猶太人知道此地不宜久留，於是數以百計猶太人走到日本領事館求助，希望杉原可以批簽證俾佢哋。但當時日本政府規定，要拎到過境簽證要先有財務證明，不過班難民又有咩可能滿足到呢項條件？杉原就向外務省問可唔可以發簽證，身為德國盟友嘅日本梗係一口拒絕，到最後杉原決定違背命令，照批簽證俾佢哋，一批就批咗超過2000份。

就算杉原要返日本，响火車月台等緊到柏林嘅列車時，仍然搏命寫簽證。據講上車後，佢仲將寫好嘅簽證丟到外面，希望車外等緊嘅難民有機會執到簽證，換嚟一線生機。杉原返到日本後，被外務省炒魷魚，其後一直低調地生活，直到1986年過世。喺過世前一年，以色列頒發「國際義人」獎項，杉原成為唯一一個獲獎嘅日本人。喺杉原逝世之後，有好多以色列人出席佢嘅喪禮，啲鄰居先知佢呢段經歷。而日本政府喺2000年由外務大臣河野洋平公開道歉，並於外務省設立杉原紀念碑，另外喺佢嘅出生地岐阜縣建立「杉原千畝紀念館」，為佢平反。

想知點解杉原甘願冒風險都要發簽證？杉原响回憶錄提到，同難民面對面時，見到佢哋滿眼淚水嘅哀求同絕望時，就會忍唔住同情佢哋，「救人命不會是件錯事」。