黃飛鴻有個徒弟叫豬肉榮，呢個就大把人都知，不過豬肉榮真名叫咩你又知唔知？答案就係林世榮。據講佢喺1908年，曾經於廣州市孤兒院嘅籌款活動上打咗套虎鶴雙形拳，獲孫中山讚賞，送咗佢一副「虎鶴先生」嘅親筆牌匾。呢副牌匾搞到好多人都以為虎鶴雙形拳係由林世榮所創，其實虎鶴雙形拳係由黃飛鴻始創，同工字伏虎拳、鐵綫拳並列為「洪拳三寶」。

講返林世榮先，佢1861年生於廣東南海，自幼跟祖父學習家傳武術。因為學武術嘅林世榮牛高馬大，老闆就請佢响豬肉檔打工，所以佢有花名叫「豬肉榮」。林世榮跟過洪拳名家胡金星習武，之後再拜北方康姓拳師同鍾雄山等五至六位師父為師，最後先做咗黃飛鴻嘅關門弟子。

其實林世榮喺拜黃飛鴻為師之前，兩人已經相識，只不過黃飛鴻晚年坎坷，先係一手創立嘅寶芝林被燒毀，其後又面臨喪子之痛，於是黃飛鴻嚴禁後代習武，亦都決定唔再收徒弟。因此，林世榮即使同黃飛鴻相識多年，都要等到40歲先入黃飛鴻門下。
咁究竟係咩原因令黃飛鴻改變主意、破例收林世榮為徒？原來林世榮為咗表示拜師嘅誠意，每日都將豬肉入面最好嘅部份送給黃飛鴻，俾傭人煮餸過黃飛鴻食。就咁維持咗一至兩年，人心肉做，黃飛鴻最終被佢打動，破例收佢為徒。
林世榮45歲果陣喺廣州開咗「林館」，跟住被樂善戲院請咗去做保鑣，但後嚟樂善戲院移交政府軍管理，政府軍知道「林館」喺當地嘅勢力大，心存顧忌，於是想方設法捉拿林世榮，林世榮喺被追捕嘅過程入面出手打人而被清廷通緝。事後，林世榮遷居香港，以授武為業，喺徒弟朱愚齋嘅協助下，將拳譜刊印公開，先後刊印咗《工字伏虎拳》、《虎鶴雙形拳》、《鐵線拳》等拳譜。

從事報業嘅朱愚齋，响報紙多次宣傳黃飛鴻同林世榮兩師徒嘅故事，令香港人有所認識。當時林世榮嘅徒弟亦包括電影圈中人，好似劉家良嘅爸爸劉湛等，後嚟黃飛鴻嘅事蹟被搬上大銀幕，系列電影更加列入健力士紀錄嘅最長系列電影，超過一百部，令黃飛鴻、豬肉榮等名字傳遍香江。而林世榮1943年喺灣仔藍屋嘅跌打醫館離世，終年82歲。