最近有關方面不斷响香港宣傳大灣區概念，其中一個想法就係話香港人可以响內地置業同定居。其實，呢個諗法並唔係乜嘢新概念，响廿幾年前香港就曾經出現過响珠三角地區嘅置業潮，當時阿史周六深夜等睇《龍珠二世》前就焗睇樟木頭嘅賣樓廣告。

樟木頭係東莞市下轄嘅一個鎮，前稱泰安，係東莞市內唯一嘅客家古鎮。自上世紀八十年代起，內地進行改革開放，東莞一帶成為港商同台商設廠嘅熱門地方，亦由於樟木頭設有火車站，所以就成為唔少港人北上活動之地。當時亦有地產公司睇準商機，响樟木頭起樓，然後响香港大賣廣告吸引香港人去買，所以就出現咗阿史頭先所講嘅賣樓廣告，仲記得已故嘅盧大偉同劉志榮都有份做代言人。

咁乜嘢人會响當地賣樓呢？主要係本身家鄉係東莞嘅人，買層樓俾親戚或作退休之用，另外仲有當年响東莞設廠嘅港商，仲有就係買樓投資或當渡假屋嘅香港人。由於當年港幣同人民幣之間有差價，所以周末北上消費係唔少港人嘅選擇。高峰時期樟木頭有15萬港人居住，所以有「小香港」之稱。

不過，隨著東莞製造業沒落，加上人民幣不斷升值，港人响樟木頭買樓意慾大減，响當地生活嘅港人減至5萬左右，新開售樓盤港人客源減至一成左右。睇嚟以前叫大家北上常平樟木頭買樓嘅廣告，都好難會再見到。