「漢榮書局」呢個名大家肯定唔陌生，唔少人喺中學年代仲幫襯過佢添。

漢榮書局創辦人石景宜係廣東佛山南海人，就喺佢啱啱入讀廣州勷（音：湘）勤大學唔夠兩年，抗日戰爭爆發，佢就喺1958年移居香港。最初佢喺奶路臣街擺地攤賣二手教科書，「開頭用幾個木箱放响地下賣，後嚟改用木頭車。」主打明碼實價嘅佢，自然吸引好多學生哥幫襯。後嚟生意漸漸穩定，石景宜就租咗通菜街國榮大廈嘅樓梯底繼續賣書，改名做國榮書店。

七十年代，國榮書店改名做漢榮書局，最高峰果陣仲喺彌敦道有間分店。每逢暑假就係書局嘅黃金檔期，營業時間朝十晚十，收鋪之後仲要補倉，無凌晨二點都駛旨意收工。漢榮賣學生教科書賣到出晒名，石景宜於是成立導師出版社有限公司，自己出版教科書，賺咗第一桶金，最後成功「上鋪」。

呢間當年用650萬買落嘅國榮大廈鋪位，據講估值4億。不過石景宜後代就話，雖然公司年年盈利，但一家人依然過住每日粗茶淡飯嘅生活。宜家漢榮嘅當家係石景宜嘅三個仔，回憶返走咗11年嘅父親石景宜，老二話爸爸相當慳家，90歲高齡果陣出街仲搭小巴。而三兄弟話自己人工甚至低過書局嘅員工，早幾年佢哋講過，三兄弟都係一家四口，加埋阿媽共十三個人。根據石景宜所定嘅規矩，星期一至五一家人要齊齊食飯。食咩？十幾人食五碟餸，包括煎腸仔、煎紅衫魚、炒蛋，仲有蔬菜。

石景宜慳埋啲錢唔係俾自己洗，而係用嚟買書捐俾內地嘅公共圖書館同大學，由80年代開始，石景宜最少捐咗成650幾萬本書。為咗表明自己捐書不求回報，石景宜禁止子女喺國內做生意。國內好多圖書館收到佢嘅捐贈之後，往往會搵著名藝術家以畫作回禮，所以石景宜生前收藏咗大量名家畫作。

不過時移世易，宜家嘅教科書行業已處於夕陽時期，喺2010年，漢榮書局嘅旺角鋪位公開招租，翌年搬離屹立40年嘅國榮大廈鋪位，搬咗去彌敦道。香港出版行業逐漸凋零，但三兄弟依然固守家業，皆因爸爸遺訓：唔可以轉行。

圖為石景宜夫婦及80年代嘅漢榮書局。

圖片嚟自佛山市石景宜劉紫英伉儷文化藝術館及漢榮書局官網。